ایرانی بیلسٹک میزائلوں کا خوف، امریکی افواج آبنائے ہرمز سے 500 کلومیٹر دور چلی گئیں: ایرانی کمانڈر

ایرانی پاسدارانِ انقلاب (IRGC) کے نائب کمانڈر میجر جنرل مصطفیٰ ایزدی نے دعویٰ کیا ہے کہ امریکی افواج ایران کے بیلسٹک میزائلوں کے خوف کی وجہ سے خلیج فارس اور بحیرہ عمان سے 500 کلومیٹر سے زائد کے فاصلے پر پیچھے ہٹ گئی ہیں۔ ایرانی میڈیا کے مطابق میجر جنرل مصطفیٰ ایزدی کا کہنا تھا کہ امریکی افواج نے سمندری حدود سے دور اپنی نئی پوزیشنیں سنبھالی ہیں اور کشیدگی کے باعث واشنگٹن کی افواج مزید پیچھے ہٹنے پر مجبور ہو سکتی ہیں۔

ایرانی کمانڈر نے مزید کہا کہ خطے کے ممالک اب اس بات کو اچھی طرح سمجھ چکے ہیں کہ خطے میں امریکی سیکیورٹی کی موجودگی امن کے بجائے عدم استحکام کا سبب بن رہی ہے۔ انہوں نے واضح کیا کہ ایرانی مسلح افواج نے حالیہ تنازعات کے دوران اپنی جنگی صلاحیتوں اور دفاعی تیاریوں میں نمایاں اضافہ کیا ہے۔