امریکا ایران کے حقوق تسلیم کرے تو معاہدے کے لیے تیار ہیں: سربراہ ایرانی وفد

ایرانی پارلیمنٹ کے سپیکر باقر قالیباف نے اسلام آباد میں صحافیوں سے گفتگو کرتے ہوئے کہا ہے کہ اگر امریکہ ایک “حقیقی ڈیل” سامنے لاتا ہے اور ایران کے حقوق کو تسلیم کرتا ہے، تو تہران معاہدے تک پہنچنے کے لیے مکمل طور پر تیار ہے۔ انہوں نے واضح کیا کہ اگرچہ ماضی میں امریکہ کے ساتھ مذاکرات کے دوران وعدہ خلافیوں کا کڑوا تجربہ رہا ہے، تاہم اس بار ایرانی وفد نیک نیتی اور اچھی امید کے ساتھ مذاکرات کی میز پر آیا ہے۔ قالیباف نے زور دیا کہ پائیدار حل کے لیے ضروری ہے کہ امریکہ اپنے وعدوں پر قائم رہے اور ایرانی حقوق کا احترام کرے۔

واضح رہے کہ امریکہ کے ساتھ ان اہم مذاکرات کے لیے سپیکر باقر قالیباف کی قیادت میں ایک اعلیٰ سطح کا ایرانی وفد گزشتہ رات گئے اسلام آباد پہنچا تھا۔ اس وفد میں ایران کے وزیر خارجہ عباس عراقچی، دفاعی کونسل کے سیکرٹری، مرکزی بینک کے گورنر اور پارلیمنٹ کے دیگر سینئر اراکین شامل ہیں، جو اس سفارتی مشن کی اہمیت کو ظاہر کرتا ہے۔

اسلام آباد پہنچنے پر ایرانی وفد کا فقید المثال استقبال کیا گیا۔ ترجمان دفترِ خارجہ کے مطابق، نائب وزیراعظم و وزیر خارجہ اسحاق ڈار نے ایئرپورٹ پر وفد کا خیرمقدم کیا، جبکہ اس موقع پر سپیکر قومی اسمبلی سردار ایاز صادق، فیلڈ مارشل سید عاصم منیر اور وفاقی وزیر داخلہ محسن نقوی بھی موجود تھے۔ سفارتی حلقے اسلام آباد میں ہونے والے ان مذاکرات کو خطے اور عالمی سیاست میں ایک بڑی پیش رفت قرار دے رہے ہیں، جہاں پاکستان ایک اہم ثالث کا کردار ادا کر رہا ہے۔