ایران چند روز میں امریکی تجاویز کا باضابطہ جواب دے گا: عباس عراقچی

ایرانی وزیرِ خارجہ سید عباس عراقچی نے انکشاف کیا ہے کہ ایران اور امریکہ کے درمیان جاری کشیدگی اور جنگ کے خاتمے کے لیے ثالثوں (بالخصوص قطر) کے ذریعے سفارتی پیغامات کا تبادلہ بلاعطل جاری ہے۔ تہران حکومت آئندہ چند روز میں واشنگٹن کی جانب سے موصول ہونے والی تجاویز کا تفصیلی باضابطہ جواب پیش کرے گی۔

عباس عراقچی کے مطابق ایران نے امریکی انتظامیہ کو سفارتی ذرائع سے ایک “سات روزہ امن منصوبہ” (7-Day Plan) پیش کیا ہے۔ انہوں نے بتایا کہ تہران کو واشنگٹن کا موقف اور تجاویز موصول ہو چکی ہیں جن کا اعلیٰ سطحی مشاورت کے ساتھ باریک بینی سے جائزہ لیا جا رہا ہے۔ ایرانی وزیرِ خارجہ کا کہنا تھا کہ دونوں ممالک کے درمیان کشیدگی کے پائیدار حل اور تجارتی گزرگاہوں سے متعلق بات چیت جاری ہے، تاہم حتمی فیصلہ مکمل جائزے اور اندرونی اتفاقِ رائے کے بعد ہی سامنے آئے گا۔