لبنان پر اسرائیلی حملے جاری رہے تو ایران جنگ بندی معاہدے سے دستبردارہوسکتاہے، ایرانی میڈیا

ایرانی خبر رساں ادارے تسنیم کادعویٰ ہے کہ اگر اسرائیل لبنان پر حملے جاری رکھتا ہے تو ایران جنگ بندی معاہدے سے دستبردار ہو سکتا ہے۔خبررساں ادارے نے ذرائع کا  حوالہ دیتے ہوئے کہا ہے کہ ایران اس امکان پر غور کر رہا ہے کہ اگراسرائیل لبنان کے خلاف اپنی کارروائیاں جاری رکھتا ہے تو جنگ بندی سے علیحدگی اختیار کی جائے۔

ذرائع نے کہا کہ دو ہفتوں کے جنگ بندی منصوبے میں امریکا نے تمام محاذوں پر جنگ روکنے پر اتفاق کیا تھا جس میں لبنان کی مزاحمتی تنظیم حزب اللہ  کے خلاف کارروائیاں بھی شامل تھیں، تاہم اسرائیل نے بدھ کی صبح سے لبنان پر حملے کر کے معاہدے کی واضح خلاف ورزی کی ہے۔

ذرائع نے کہا کہ ایران ایک جانب جنگ بندی معاہدے سے دستبردار پونے  پر غور کر رہا ہے جبکہ دوسری جانب ایرانی مسلح افواج لبنان کے خلاف اسرائیلی حملوں کے جواب کے لیے اہداف کی نشاندہی کر رہی ہیں۔

ذرائع نے مزید کہا کہ اگر امریکا خطے میں اپنے اتحادی کو کنٹرول نہیں کر سکا تو ایران خود اس معاملے میں طاقت کے ذریعے کردار ادا کرے گا۔