ایران کی میزائل صلاحیت مذاکرات سے باہر، محدود حملہ بھی جنگ تصور ہوگا: علی شمخانی

ایران نے اپنی میزائل صلاحیت کو قومی سلامتی کی غیر متزلزل حد قرار دیتے ہوئے واضح کردیا ہے کہ اسے کسی بھی ممکنہ مذاکراتی عمل میں شامل نہیں کیا جائے گا۔

سپریم لیڈر آیت اللہ خامنہ ای کے مشیر علی شمخانی نے تہران میں اسلامی انقلاب کی سالگرہ کی تقریب سے خطاب کرتے ہوئے کہا کہ ایران کی دفاعی طاقت قابلِ گفت و شنید نہیں۔ ان کا کہنا تھا کہ ایران کی میزائل صلاحیت پر کوئی سمجھوتہ نہیں ہوگا اور یہ ملک کی خودمختاری کا بنیادی جزو ہے۔

علی شمخانی نے سخت پیغام دیتے ہوئے کہا کہ اگر ایران کے خلاف کسی بھی درجے کی محدود عسکری کارروائی کی گئی تو اسے براہِ راست جنگ کا آغاز تصور کیا جائے گا۔ انہوں نے امریکہ کو مخاطب کرتے ہوئے کہا کہ خطے میں کشیدگی بڑھانے کے بجائے سفارتی راستہ اپنانا ہی دانشمندی ہوگی۔

یاد رہے کہ امریکی صدر ڈونلڈ ٹرمپ نے خبردار کیا تھا کہ مذاکرات ناکام ہونے کی صورت میں ایران کے خلاف فوجی آپشنز زیرِ غور ہیں اور خطے میں اضافی بحری بیڑے کی تعیناتی ممکن ہے۔