وفاقی وزیر داخلہ محسن نقوی آج اہم سرکاری دورے پر ایران روانہ ہوں گے

اسلام آباد: وفاقی وزیر داخلہ سید محسن رضا نقوی ایک اہم سرکاری دورے پر آج ایران روانہ ہو رہے ہیں، جہاں وہ دارالحکومت تہران میں ایرانی حکومت کے اعلیٰ نمائندوں اور حکام سے ملاقاتیں کریں گے۔ ان ملاقاتوں میں پاکستان اور ایران کے مابین دوطرفہ تعلقات، خطے کی مجموعی سیکیورٹی صورتحال اور باہمی دلچسپی کے دیگر اہم امور پر تفصیلی تبادلہ خیال کیا جائے گا۔ ذرائع کے مطابق، تہران میں ہونے والی ان بیٹھکوں میں ایران اور امریکہ کے درمیان جاری حالیہ مذاکرات اور سفارتی پیش رفت بھی بات چیت کا بنیادی حصہ ہوں گے۔

وزیر داخلہ محسن نقوی خطے میں جاری کشیدگی کو کم کرنے اور تہران و واشنگٹن کے درمیان مذاکرات کے فروغ کے لیے پاکستان کی مسلسل سفارتی کوششوں کے سلسلے میں اس سے قبل بھی متعدد بار تہران کا دورہ کر چکے ہیں۔ سیاسی و سفارتی ماہرین کی جانب سے ان کے اس تازہ دورے کو خطے کی موجودہ نازک صورتحال، جاری امن عمل اور علاقائی سفارت کاری کے تناظر میں انتہائی اہمیت کا حامل قرار دیا جا رہا ہے۔