بھارت میں راہول گاندھی کی قیادت میں اپوزیشن جماعتوں کا جمہوریت بچاؤ مارچ

 اپوزیشن جماعتوں کے اتحاد ’انڈیا‘ (INDIA) نے راہول گاندھی کی قیادت میں انتخابی فہرستوں میں مبینہ دھاندلیوں اور بے ضابطگیوں کے خلاف نئی دہلی میں ایک بڑی احتجاجی ریلی نکالی، جسے ’جمہوریت بچاؤ مارچ‘ کا نام دیا گیا تھا۔

نئی دہلی کے تاریخی رام لیلا میدان تک نکالی جانے والی اس میگا ریلی میں ہزاروں کی تعداد میں عام شہریوں اور اپوزیشن کارکنوں نے بھرپور شرکت کی۔ اس موقع پر اپوزیشن رہنماؤں نے ووٹر لسٹوں میں کی جانے والی متنازعہ تبدیلیوں پر شدید برہمی کا اظہار کرتے ہوئے چیف الیکشن کمشنر سے فوری مستعفی ہونے کا پرزور مطالبہ کیا۔ کانگریس کے سینئر رہنما راہول گاندھی نے ریلی کے شرکاء سے خطاب کرتے ہوئے سخت تنقید کی اور اعلان کیا کہ چیف الیکشن کمشنر گیانیش کمار کو ان کے عہدے سے ہٹا کر جیل بھیجا جائے گا۔ انہوں نے مزید کہا کہ گیانیش کمار کے استعفے کے بعد وزیر اعظم نریندر مودی اور وزیر داخلہ امیت شاہ کا بھی احتساب کیا جائے گا، اور ووٹ چوری کے اس گھناؤنے عمل میں ملوث تمام افراد کو قانون کے کٹہرے میں لایا جائے گا۔