علی ناصر رضوی تبدیل، سہیل چودھری آئی جی اسلام آباد تعینات

وفاقی دارالحکومت میں اہم انتظامی تبدیلی کے تحت انسپکٹر جنرل (آئی جی) اسلام آباد پولیس علی ناصر رضوی کو ان کے عہدے سے تبدیل کر دیا گیا ہے، جبکہ ان کی جگہ سینئر پولیس افسر سہیل چوہدری کو نیا آئی جی اسلام آباد تعینات کر دیا گیا ہے۔

ذرائع کے مطابق عہدے سے تبدیل کیے جانے والے سابق آئی جی علی ناصر رضوی کو نیشنل سائبر کرائم انویسٹی گیشن ایجنسی (NCCIA) کا نیا ڈائریکٹر جنرل (ڈی جی) تعینات کیے جانے کا قوی امکان ہے۔ ذرائع کا مزید کہنا ہے کہ ان تقرریوں اور تبادلوں سے متعلق اسٹیبلشمنٹ ڈویژن کی جانب سے باضابطہ نوٹیفکیشن عنقریب جاری کیا جائے گا۔