جناح ہاؤس حملہ کیس: انسدادِ دہشت گردی عدالت نے پی ٹی آئی رہنما حماد اظہر کا 21 روزہ جسمانی ریمانڈ منظور کر لیا

لاہور: 9 مئی کے جلاؤ گھیراؤ اور جناح ہاؤس پر حملے کی تحقیقات کے سلسلے میں انسدادِ دہشت گردی عدالت (ATC) لاہور نے پاکستان تحریکِ انصاف کے رہنما اور سابق وفاقی وزیر حماد اظہر کا 21 روزہ جسمانی ریمانڈ منظور کرتے ہوئے انہیں پولیس کی تحویل میں دے دیا ہے۔

حماد اظہر، جنہیں انسدادِ دہشت گردی کی عدالت نے طویل عرصے سے اشتہاری قرار دے رکھا تھا، کو سخت سیکورٹی کے حصار میں اے ٹی سی جج سردار محمد اکرم خان کی عدالت میں پیش کیا گیا۔ سماعت کے آغاز پر جج کے حکم پر میڈیا نمائندوں اور غیر متعلقہ افراد کو کمرہٴ عدالت سے باہر نکال دیا گیا اور محض وکلاء اور تفتیشی حکام کو اندر رہنے کی اجازت دی گئی۔

تفتیشی افسر نے موقف اختیار کیا کہ حماد اظہر 9 مئی کو تھانہ سرور روڈ میں درج مقدمہ نمبر 96/23 (جناح ہاؤس حملہ کیس) سمیت لاہور کے تمام 14 مقدمات میں نامزد ہیں۔ تفتیش مکمل کرنے کے لیے پولیس کی جانب سے جسمانی ریمانڈ کی استدعا کی گئی۔ عدالت نے فیصلہ محفوظ کرنے کے بعد 20 روزہ جسمانی ریمانڈ کی منظوری دی، تاہم اتوار کی سرکاری تعطیل کے باعث ریمانڈ میں ایک دن کی توسیع کرتے ہوئے کل 21 روزہ جسمانی ریمانڈ منظور کر لیا۔ عدالت نے پولیس کو ہدایت کی کہ ملزم کو تفتیش مکمل کر کے 28 ستمبر کو دوبارہ پیش کیا جائے۔