پی ٹی آئی رہنما حماد اظہر کی بازیابی کے لیے لاہور ہائیکورٹ میں درخواست دائر

لاہور: پاکستان تحریکِ انصاف (پی ٹی آئی) کے مرکزی رہنما حماد اظہر کی حراست اور ممکنہ جبری گمشدگی کے خلاف ان کی والدہ نے لاہور ہائیکورٹ سے رجوع کر لیا ہے۔حماد اظہر کی والدہ کی جانب سے یہ آئینی درخواست بیرسٹر ابوزر سلیمان خان نیازی کی وساطت سے دائر کی گئی ہے، جس میں آئی جی پنجاب، سی سی پی او لاہور اور دیگر متعلقہ انتظامی و پولیس حکام کو فریق بنایا گیا ہے۔درخواست گزار کے وکیل نے موقف اختیار کیا کہ حماد اظہر کو دو روز قبل ملتان سے حراست میں لیا گیا تھا، تاہم گرفتاری کے بعد سے اب تک انہیں قانون کے مطابق کسی بھی متعلقہ عدالت میں پیش نہیں کیا گیا ہے اور نہ ہی ان کی گرفتاری کو باضابطہ طور پر ظاہر کیا جا رہا ہے۔

درخواست میں استدعا کی گئی ہے کہ لاہور ہائیکورٹ حماد اظہر کو فوری طور پر بازیاب کرا کے عدالت میں پیش کرنے کا حکم دے، متعلقہ حکام کو ان کی گرفتاری قانون کے مطابق ظاہر کرنے کا پابند بنائے اور ان کے خلاف درج تمام مقدمات کا مکمل ریکارڈ عدالت میں پیش کرنے کے احکامات جاری کرے۔