مطالبات نہ مانے گئے تو حکومت گراؤ تحریک چلائیں گے: حافظ نعیم الرحمان

امیرِ جماعتِ اسلامی حافظ نعیم الرحمان نے حکومت کو شدید تنقید کا نشانہ بناتے ہوئے خبردار کیا ہے کہ اگر ان کے جائز مطالبات تسلیم نہ کیے گئے تو وہ ملک گیر ‘حکومت گراؤ تحریک’ کا آغاز کریں گے۔ صوبائی دارالحکومت لاہور میں دھرنے کے شرکاء سے خطاب کرتے ہوئے انہوں نے کہا کہ پنجاب بھر میں جماعتِ اسلامی کا احتجاج اور دھرنے مسلسل پھیل رہے ہیں اور یہ جدوجہد ملک سے ظالمانہ نظام کے خاتمے تک جاری رہے گی۔ حافظ نعیم الرحمان نے کہا کہ موجودہ حکمران طبقے نے وڈیروں اور جاگیرداروں پر مشتمل ایک کنسورشیم بنا رکھا ہے جو عام عوام کو ان کے بنیادی اور جمہوری حقوق سے محروم کر رہا ہے۔

معاشی اصلاحات اور سرکاری فضول خرچیوں پر بات کرتے ہوئے امیرِ جماعتِ اسلامی نے تجویز دی کہ اگر اسٹیٹ بینک سود کی شرح میں 3 فیصد کمی کرے تو قومی خزانے کے تقریباً 1,500 ارب روپے بچائے جا سکتے ہیں۔ انہوں نے بیوروکریسی کی شاہخرچیوں کی مذمت کرتے ہوئے مطالبہ کیا کہ افسران کو دی جانے والی لگژری گاڑیوں اور مفت پٹرول کی سہولت ختم کر کے کسی بھی سرکاری افسر کو 1300 سی سی سے بڑی گاڑی فراہم نہ کی جائے۔ انہوں نے متنبہ کیا کہ اگر حکومت کے ساتھ مذاکرات ناکام ہوئے تو ابتدا میں پہیہ جام اور مکمل شٹر ڈاؤن ہڑتال کی جائے گی اور مطالبات نہ مانے جانے کی صورت میں حکومت کا تختہ الٹنے کی تحریک شروع کی جائے گی۔