حافظ نعیم الرحمان کی حکومت کو اسلام آباد مارچ کی دھمکی

امیر جماعت اسلامی حافظ نعیم الرحمن نے کراچی دھرنے کے 26 ویں روز شرکاء سے خطاب کرتے ہوئے حکومت کو شدید تنقید کا نشانہ بنایا اور اعلان کیا ہے کہ وہ گوجرانوالہ کے جلسے میں اسلام آباد لانگ مارچ کی حتمی تاریخ کا اعلان کریں گے۔ انہوں نے کہا کہ حکومت اپنی شاہ خرچیاں کم کرنے کے بجائے غریب عوام پر ٹیکسوں اور پٹرولیم لیوی کا بوجھ ڈال کر ’بھتہ‘ وصول کر رہی ہے۔ عالمی مارکیٹ کی خام تیل کی قیمتوں کا بہانہ بنا کر عوام پر پٹرول بم گرایا جا رہا ہے، جبکہ لیوی ٹیکس کی وجہ سے طالب علم، کسان، مزدور اور اساتذہ سمیت ہر طبقہ شدید متاثر ہوا ہے۔

انہوں نے مزید کہا کہ حکومت سے مذاکرات کے دو دور ہو چکے ہیں لیکن حکومتی کمیٹی کے پاس جماعت اسلامی کے سوالات کا کوئی جواب نہیں ہے اور وہ بار بار مہلت مانگ رہی ہے۔ تعلیم اور زراعت کی صورتحال پر تشویش کا اظہار کرتے ہوئے انہوں نے کہا کہ پنجاب میں 11 ہزار سرکاری اسکولوں کو نجی تحویل میں دیا جا رہا ہے جہاں نویں جماعت کے 52 فیصد بچے فیل ہوئے۔ حافظ نعیم الرحمن نے واضح کیا کہ دھرنے نے ملک کی سیاست کا رخ بدل دیا ہے اور کل منصورہ میں ملک بھر سے جماعت اسلامی کی مرکزی قیادت کا اجلاس طلب کیا گیا ہے جس کے بعد گوجرانوالہ کے جلسے سے اسلام آباد مارچ کی حتمی تاریخ کا اعلان کیا جائے گا