ملک حکمرانوں کی نااہلی اور کرپشن کی وجہ سے ڈوب رہا ہے: حافظ نعیم الرحمان

کراچی: امیر جماعتِ اسلامی حافظ نعیم الرحمان نے کہا ہے کہ ملک حکمرانوں کی نااہلی، کرپشن اور شاہانہ اخراجات کے باعث شدید معاشی بحران کا شکار ہے، جبکہ حکومت عوام کو ریلیف فراہم کرنے کے بجائے ان کے ساتھ دو نمبری کر رہی ہے۔

کراچی میں فیڈریشن آف پاکستان چیمبرز آف کامرس اینڈ انڈسٹری (FPCCI) کے دورے کے موقع پر بزنس کمیونٹی کے عہدیداروں سے گفتگو کرتے ہوئے حافظ نعیم الرحمان نے حکومت کی مالیاتی پالیسیوں پر شدید تنقید کی۔ انہوں نے نشاندہی کی کہ پنجاب حکومت نے 11 ارب روپے کی لاگت سے نیا جہاز خریدا، جس سے ظاہر ہوتا ہے کہ حکمران طبقات اپنے شاہانہ اخراجات میں کسی قسم کی کمی لانے کو تیار نہیں۔

امیر جماعتِ اسلامی نے دعویٰ کیا کہ عوام سے پٹرولیم لیوی کی مد میں 8 ہزار ارب روپے سے زائد کا بھتہ وصول کیا جا رہا ہے، جسے فوری طور پر ختم کیا جانا چاہیے۔ انہوں نے عزم ظاہر کیا کہ جماعتِ اسلامی آئی پی پیز (IPPs) اور کے الیکٹرک مافیا کے خلاف اپنی جدوجہد جاری رکھے گی۔ حافظ نعیم الرحمان نے اعلان کیا کہ حکومت کی عوام مخالف پالیسیوں کے خلاف 3 ستمبر کو پورے ملک میں مکمل ہڑتال کی جائے گی، جبکہ حکومتی کمیٹی سے مذاکرات کے باوجود دھرنا اور عوامی احتجاج جاری رہے گا۔