سانحہ گل پلازا: پولیس کا چالان عدالت میں جمع، ایسوسی ایشن مرکزی ذمہ دار قرار

کراچی: پولیس نے گل پلازا میں پیش آنے والے آتشزدگی کے کیس کا حتمی تفتیشی چالان عدالت میں جمع کرادیا ہے، جس میں فائر سیفٹی کے ناقص انتظامات اور مبینہ غفلت کی بنا پر مارکیٹ ایسوسی ایشن کو واقعے کا مرکزی ذمہ دار قرار دیا گیا ہے۔

عدالت میں جمع کرائے گئے چالان میں پولیس نے 87 افراد کو گواہ کے طور پر شامل کیا ہے۔ تفتیشی رپورٹ میں کے ایم سی (KMC)، فائر بریگیڈ اور سول ڈیفنس کو کسی بھی قسم کی غفلت سے بری الذمہ قرار دیا گیا ہے۔ رپورٹ کے مطابق تفتیش کے دوران عمارت کی سی سی ٹی وی فوٹیجز سمیت دیگر اہم تحریری اور عینی شاہدین کے بیانات حاصل کیے گئے۔ فارنزک رپورٹ کا حوالہ دیتے ہوئے چالان میں کہا گیا ہے کہ موقع سے ملنے والے نمونوں میں کسی قسم کے دھماکہ خیز مواد یا قابلِ اشتعال مائع (شعلہ انگیز کیمیکل) کے شواہد نہیں ملے، بلکہ محض جلنے کے بعد باقی رہ جانے والے ذرات پائے گئے ہیں۔

چالان میں واضح طور پر کہا گیا ہے کہ گل پلازا کی انتظامیہ اور مارکیٹ ایسوسی ایشن عمارت میں آگ بجھانے کے ضروری آلات اور فائر سیفٹی کا نظام فراہم کرنے میں ناکام رہی۔ پولیس نے چالان مزید قانونی اور عدالتی کارروائی کے لیے متعلقہ عدالت کے سپرد کر دیا ہے۔