گومل یونیورسٹی سے ملحقہ نجی کالجز کے ریکارڈ میں بے ضابطگیوں کا انکشاف

ڈیرہ اسماعیل خان کی گومل یونیورسٹی سے ملحقہ نجی کالجز کے تعلیمی ریکارڈ، داخلوں، رجسٹریشن، طالب علموں کی حاضری اور امتحانات کے نظام میں سنگین بے ضابطگیاں اور خامیوں کا انکشاف ہوا ہے۔ ہائیر ایجوکیشن اتھارٹی (HEA) کی جانب سے کی جانے والی فزیکل انسپکشن اور جائزہ رپورٹ کے بعد محکمہ اعلیٰ تعلیم خیبر پختونخوا نے سخت ایکشن لیتے ہوئے معاملہ چیئرمین ہائیر ایجوکیشن کمیشن (HEC) کے سامنے اٹھا دیا ہے۔ صوبائی حکومت اور محکمہ اعلیٰ تعلیم نے گومل یونیورسٹی کے نجی ملحقہ کالجوں کے علاقائی دائرۂ اختیار، ڈگریوں اور تمام تعلیمی پروسیس کی مکمل تصدیق کا مطالبہ کیا ہے جبکہ صورتحال واضح ہونے تک غیر رجسٹرڈ پروگرامز میں نئے داخلوں پر پابندی کی سفارش کر دی ہے۔