توانائی بحران اور علاقائی کشیدگی کے باعث کاروباری اعتماد میں نمایاں کمی: گیلپ پاکستان سروے

گیلپ پاکستان کے تازہ ترین سروے کے مطابق پاکستان کے نجی شعبے میں کاروباری اعتماد میں نمایاں کمی ریکارڈ کی گئی ہے، جس کی بنیادی وجوہات توانائی کی بڑھتی ہوئی قیمتیں اور علاقائی جغرافیائی و سیاسی کشیدگی بتائی جاتی ہیں۔ سروے رپورٹ کے مطابق موجودہ کاروباری صورتحال، مستقبل کے امکانات اور ملکی معاشی سمت سے متعلق تمام اہم اعشاریے منفی رجحان کی عکاسی کر رہے ہیں، اور مجموعی مثبت رجحان میں 27 فیصد کمی دیکھی گئی ہے۔

رپورٹ میں بتایا گیا ہے کہ صرف 41 فیصد اداروں نے اپنے موجودہ آپریشنز کو ‘اچھا’ قرار دیا ہے، جبکہ 57 فیصد کاروباری ادارے مستقبل کے حوالے سے شدید مایوسی کا شکار ہیں۔ ملک کی مجموعی معاشی سمت کے بارے میں اعتماد گزشتہ سہ ماہی کے منفی 8 فیصد سے گر کر منفی 32 فیصد ہو گیا ہے۔ سروے میں شامل 62 فیصد شرکاء نے مہنگائی اور پیداواری لاگت کو سب سے بڑا مسئلہ قرار دیا، جبکہ 57 فیصد نے لوڈشیڈنگ کی شکایت کی ہے، جو گزشتہ سہ ماہی کے مقابلے میں 15 فیصد زیادہ ہے۔

عالمی صورتحال کے حوالے سے 81 فیصد کاروباری اداروں کا خیال ہے کہ مشرقِ وسطیٰ میں جاری کشیدگی ملکی کاروباری ماحول پر منفی اثرات مرتب کر رہی ہے۔ حکومتی کارکردگی پر بھی عدم اطمینان کا اظہار کیا گیا ہے، جہاں 46 فیصد شرکاء نے حکومت پر عدم اعتماد کا اظہار کیا۔ گیلپ پاکستان کے ایگزیکٹو ڈائریکٹر بلال اعجاز گیلانی کا کہنا ہے کہ داخلی معاشی دباؤ اور بیرونی لاگت میں اضافے کے باعث کاروباری طبقے میں غیر یقینی صورتحال اور مایوسی مسلسل بڑھ رہی ہے۔