وزیر خزانہ محمد اورنگزیب کا اہم انٹرویو؛ پاکستان کا ایک ارب ڈالر کے پانڈا بانڈز اور نئے مالیاتی ذرائع کی تلاش کا اعلان

وفاقی وزیر خزانہ محمد اورنگزیب نے عالمی خبر رساں ادارے ‘رائٹرز’ کو دیے گئے ایک تفصیلی انٹرویو میں پاکستان کی معاشی حکمتِ عملی اور مستقبل کے منصوبوں پر روشنی ڈالی ہے۔ وزیر خزانہ نے انکشاف کیا کہ متحدہ عرب امارات (UAE) کے 3.5 ارب ڈالر کے قرض کی واپسی کے بعد پاکستان متبادل فنانسنگ کے تمام ممکنہ ذرائع پر غور کر رہا ہے۔ انہوں نے بتایا کہ پاکستان آئندہ ماہ اپنا پہلا پانڈا بانڈ جاری کرنے کے لیے تیار ہے، جس کی مالیت ابتدائی طور پر 250 ملین ڈالر ہوگی، جبکہ مجموعی طور پر ایک ارب ڈالر کے پانڈا بانڈز کے اجرا کا منصوبہ ہے۔ اس کے علاوہ یورو بانڈز، اسلامی سکوک اور ڈالر سیٹلڈ روپے بانڈز پر بھی کام جاری ہے۔

وزیر خزانہ نے آئی ایم ایف پروگرام کے حوالے سے اہم بات کرتے ہوئے کہا کہ اگر مشرقِ وسطیٰ میں جنگ جاری رہتی ہے تو 7 ارب ڈالر کے پروگرام کی شرائط پر نظرثانی کا امکان مسترد نہیں کیا جا سکتا۔ انہوں نے امید ظاہر کی کہ پاکستان کو جلد آئی ایم ایف سے 1.3 ارب ڈالر کی قسط مل جائے گی۔ محمد اورنگزیب نے ملکی زرِ مبادلہ کے ذخائر کو تسلی بخش قرار دیتے ہوئے کہا کہ یہ اس وقت تقریباً 2.8 ماہ کی درآمدات کے برابر ہیں، تاہم معاشی استحکام کے لیے اس سطح کو برقرار رکھنا ناگزیر ہے۔

علاقائی صورتحال پر بات کرتے ہوئے وزیر خزانہ نے کہا کہ مشرقِ وسطیٰ کے تنازع کی وجہ سے تیل کی قیمتوں میں اضافے کا خدشہ ہے، جس سے نمٹنے کے لیے حکومت اسٹریٹجک پیٹرولیم اور ایل پی جی ذخائر بنانے پر غور کر رہی ہے۔ انہوں نے ملکی معیشت کے مثبت اشاریوں کا ذکر کرتے ہوئے بتایا کہ رواں مالی سال جی ڈی پی گروتھ 4 فیصد اور ترسیلاتِ زر 41.5 ارب ڈالر تک پہنچنے کی توقع ہے۔ وزیر خزانہ نے یہ بھی واضح کیا کہ پاکستان عالمی سطح پر امریکہ اور ایران کے درمیان ثالثی کا کردار ادا کر رہا ہے، اور بیرونی چیلنجز کے باوجود حکومت ملکی معیشت کو سنبھالنے کی مکمل صلاحیت رکھتی ہے۔