پاکستان کو دوبارہ عروج و زوال کے معاشی چکر میں نہیں جانے دیں گے: وزیر خزانہ

اسلام آباد میں ایک تقریب سے خطاب کرتے ہوئے وفاقی وزیرِ خزانہ محمد اورنگزیب نے عزم ظاہر کیا ہے کہ حکومت پاکستان کو دوبارہ عروج و زوال کے روایتی معاشی چکر میں بالکل نہیں جانے دے گی اور مشکل فیصلوں کے نتیجے میں حاصل ہونے والے معاشی استحکام کو پائیدار بنانے کے لیے بنیادی ڈھانچہ جاتی اصلاحات، پبلک پرائیویٹ پارٹنرشپ اور شفاف نجکاری کو کلیدی ترجیح کے طور پر آگے بڑھایا جا رہا ہے۔ وزیرِ خزانہ نے بتایا کہ سخت اقتصادی اقدامات سے مجموعی مالیاتی خسارہ 12.5 فیصد سے کم ہو کر 2.6 فیصد پر آ گیا ہے، ایف بی آر کی آمدن میں گزشتہ چند برسوں میں 40 فیصد اضافہ ہوا اور ٹیکس ٹو جی ڈی پی تناسب 8.8 فیصد سے بڑھ کر 10.3 فیصد تک پہنچ گیا ہے، جبکہ گزشتہ مالی سال آئی ٹی برآمدات 4.6 ارب ڈالر رہیں جن میں فری لانسرز نے 1.6 ارب ڈالر کا حصہ ڈالا۔