پاسکو اور یوٹیلیٹی اسٹورز کی بندش: وزیرِ خزانہ کی شفافیت اور عمل جلد مکمل کرنے کی ہدایت

اسلام آباد: وفاقی وزیرِ خزانہ کی زیرِ صدارت پاکستان زرعی ذخائر و خدمات کارپوریشن (پاسکو) اور یوٹیلیٹی اسٹورز کارپوریشن کی باضابطہ بندش کے عمل کا تفصیلی جائزہ لینے کے لیے ایک اہم اعلیٰ سطحی اجلاس منعقد ہوا۔

اجلاس کے دوران یوٹیلیٹی اسٹورز کی بندش، ملازمین کے واجبات کی ادائیگی اور سیورنس (ملازمت سے برطرفی) پیکیج پر ہونے والی پیش رفت کا باریک بینی سے معائنہ کیا گیا۔ بریفنگ میں بتایا گیا کہ یوٹیلیٹی اسٹورز کے موجودہ اسٹاک کی واپسی اور تلفی کا عمل تیز کر دیا گیا ہے، جبکہ ریکس اور دیگر منقولہ اثاثوں کی نیلامی پر کام جاری ہے۔ مزید برآں، آئی ٹی آلات اور گاڑیوں کی فزیکل تصدیق اور آڈٹ کے ساتھ ساتھ جائیدادوں کی منتقلی یا فروخت اور عدالتوں میں زیرِ التوا مقدمات کی قانونی صورتحال کا بھی احاطہ کیا گیا۔

اجلاس میں پاسکو کی بندش کے سلسلے میں مختلف صوبوں میں موجود گندم اور دیگر غذائی اجناس کے اسٹاک کی منتقلی کے انتظامات پر بھی غور کیا گیا۔ وزیرِ خزانہ نے ہدایت کی کہ پاسکو کے معاملے میں صوبائی حکومتوں کے ساتھ مسلسل اور قریبی رابطہ برقرار رکھا جائے۔ انہوں نے تمام مالی، انتظامی اور قانونی امور کو طے شدہ ٹائم لائن کے مطابق نمٹانے، عوامی وسائل کا تحفظ یقینی بنانے اور ہر مرحلے پر مکمل شفافیت قائم رکھنے پر زور دیا۔