عظیم کشمیری رہنما سید علی گیلانی کی آج پانچویں برسی منائی جارہی ہے

لائن آف کنٹرول (LoC) کے دونوں اطراف اور دنیا بھر میں مقیم کشمیری بابائے حریت سید علی گیلانی کی 5 ویں برسی منا رہے ہیں۔ سید علی گیلانی نے بھارتی مظالم کا ڈٹ کر مقابلہ کیا اور دو دہائیوں سے زائد کا عرصہ بھارتی جیلوں میں گزارا لیکن آخری سانس تک غلامی قبول نہ کی۔ 29 ستمبر 1929ء کو بانڈی پورہ میں پیدا ہونے والے سید علی گیلانی نے اورینٹل کالج لاہور سے اعلیٰ تعلیم حاصل کی اور 1949ء میں جماعت اسلامی میں شامل ہوئے۔ وہ مقبوضہ کشمیر کی قانون ساز اسمبلی کے 3 مرتبہ رکن منتخب ہوئے اور 1994ء میں کل جماعتی حریت کانفرنس کی بنیاد ڈالی۔ یکم ستمبر 2021ء کو ایامِ اسیری اور نظر بندی کے دوران وفات پانے والے اس عظیم رہنما کو حکومتِ پاکستان کی جانب سے ‘نشانِ پاکستان’ کا اعلا ترین اعزاز بھی عطا کیا گیا ہے۔