بلوچستان کے عوام کا امن، خوشحالی اور فلاح ریاستی کوششوں کا مرکز ہے: فیلڈ مارشل

کوئٹہ: پاک فوج کے سپہ سالار فیلڈ مارشل سید عاصم منیر نے کہا ہے کہ بلوچستان کے عوام کا امن، خوشحالی اور فلاح و بہبود ریاستِ پاکستان کی تمام تر کوششوں کا بنیادی مرکز ہے۔

پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے کوئٹہ گیریژن کا دورہ کیا، جہاں آمد پر کمانڈر کوئٹہ کور نے ان کا پرتباک استقبال کیا۔ دورے کے دوران انہیں بلوچستان میں سیکیورٹی کی مجموعی صورتحال، آپریشنل تیاریوں اور صوبے میں پائیدار امن و استحکام کے لیے جاری اقدامات پر جامع بریفنگ دی گئی۔ فیلڈ مارشل نے فیلڈ فارمیشنز کے کمانڈرز اور افسران سے گفتگو کرتے ہوئے سماجی و اقتصادی ترقی اور عوامی فلاح سے متعلق امور کا تفصیلی جائزہ لیا۔

انہوں نے پاک فوج اور قانون نافذ کرنے والے اداروں کے جوانوں کی اعلیٰ پیشہ ورانہ صلاحیت، فرض شناسی اور عزم کو سراہتے ہوئے کہا کہ پائیدار امن ہی وہ سازگار ماحول فراہم کرتا ہے جو معاشی سرگرمیوں، ترقیاتی منصوبوں اور روزگار کے مواقع کے لیے ضروری ہے۔ فیلڈ مارشل نے شہداء کی عظیم قربانیوں کو خراجِ عقیدت پیش کرتے ہوئے اس عزم کا اعادہ کیا کہ صوبے کے امن و امان کی حفاظت کے لیے تمام تر صلاحیتیں کارآمد لائی جائیں گی۔