فیلڈ مارشل سید عاصم منیر سرکاری دورے پر ترکیہ پہنچ گئے

فیلڈ مارشل و چیف آف ڈیفنس فورسز سید عاصم منیر اہم سرکاری دورے پر ترکیہ پہنچ گئے ہیں۔ پاک فوج کے شعبہ تعلقاتِ عامہ (آئی ایس پی آر) کے مطابق، ان کا یہ دورہ پاکستان اور ترکیہ کے درمیان دفاعی و سٹریٹجک تعاون کو مزید مضبوط بنانے کے حوالے سے انتہائی اہمیت کا حامل ہے۔ دورے کے دوران سید عاصم منیر کی ترکیہ کی اعلیٰ سیاسی اور عسکری قیادت سے اہم ملاقاتیں متوقع ہیں، جن میں باہمی دلچسپی کے امور، علاقائی سلامتی کی صورتحال اور باہمی دفاعی تعاون کو فروغ دینے پر تفصیلی تبادلہ خیال کیا جائے گا۔ ترجمان پاک فوج کا کہنا ہے کہ پاکستان اور ترکیہ کے درمیان تاریخی اور برادرانہ تعلقات قائم ہیں، جبکہ پاکستان، ترکیہ اور سعودی عرب کے درمیان سہ فریقی دفاعی تعاون کو آگے بڑھانے کے لیے اعلیٰ سطحی رابطے بھی جاری ہیں۔