قومی اسمبلی میں آج وفاقی بجٹ پیش کیا جائے گا، دفاع اور قرضوں کیلئے بھاری رقوم مختص

اسلام آباد: وفاقی حکومت آج قومی اسمبلی میں مالی سال 27-2026 کا بجٹ پیش کرے گی، جس میں معیشت کے مختلف شعبوں کے لیے مالی اہداف اور حکومتی ترجیحات کا تعین کیا جائے گا۔

وزیر خزانہ محمد اورنگزیب قومی اسمبلی کے اجلاس میں ساڑھے 17 ہزار ارب روپے مالیت کا بجٹ پیش کریں گے۔ بجٹ میں ٹیکس آمدن کا ہدف 15 ہزار 267 ارب روپے مقرر کیے جانے کا امکان ہے۔

دستاویزات کے مطابق قرضوں پر سود کی ادائیگی کے لیے 7 ہزار 824 ارب روپے جبکہ دفاعی ضروریات کے لیے 3 ہزار ارب روپے مختص کیے جائیں گے۔ سرکاری ملازمین اور پنشنرز کے لیے مالی ریلیف سے متعلق تجاویز بھی بجٹ کا حصہ بن سکتی ہیں۔

حکومت نے پٹرولیم لیوی سے ایک ہزار 727 ارب روپے حاصل کرنے کا منصوبہ تیار کیا ہے۔ بجٹ میں برآمدات کو 32 ارب 80 کروڑ ڈالر اور درآمدات کو 70 ارب ڈالر تک محدود رکھنے کا ہدف مقرر کیے جانے کی تجویز ہے۔

ذرائع کا کہنا ہے کہ نئے ترقیاتی منصوبوں کے بجائے جاری منصوبوں کی تکمیل کو ترجیح دی جائے گی، جبکہ سابق قبائلی اضلاع کے لیے ٹیکس چھوٹ ختم کرنے کی تجویز بھی زیر غور ہے۔

دوسری جانب گزشتہ روز پیش کیے گئے اقتصادی جائزے کے مطابق ملکی معیشت کی شرح نمو 3 اعشاریہ 7 فیصد رہی جبکہ معیشت کا مجموعی حجم 452 ارب ڈالر تک پہنچ گیا۔ اقتصادی جائزے میں فی کس آمدن، زرمبادلہ کے ذخائر، برآمدات اور رجسٹرڈ کمپنیوں کی تعداد میں اضافے کی نشاندہی بھی کی گئی ہے۔