میکسیکو میں مافیا سربراہ ال مینچو کی ہلاکت کے بعد پرتشدد ہنگامے، نیشنل گارڈ کے 25 اہلکار مارے گئے

میکسیکو میں منشیات فروش گروہ کے بدنام زمانہ سربراہ ال مینچو کی فوجی کارروائی میں ہلاکت کے بعد ملک بھر میں ہنگامے پھوٹ پڑے، جن میں نیشنل گارڈ کے 25 اہلکار ہلاک ہوگئے۔

حکام کے مطابق مغربی ریاست جالسکو میں سکیورٹی فورسز اور مسلح افراد کے درمیان شدید فائرنگ کا تبادلہ ہوا، جس کے دوران ال مینچو زخمی ہوگیا۔ اسے فوری طور پر میکسیکو سٹی  منتقل کیا جا رہا تھا تاہم وہ راستے میں دم توڑ گیا۔

رپورٹس کے مطابق ال مینچو کے سر کی قیمت ڈیڑھ کروڑ ڈالر مقرر تھی۔ اس کی ہلاکت کے بعد مختلف شہروں میں مسلح افراد نے گاڑیوں کو آگ لگا دی، شاہراہیں بند کر دیں اور کئی مقامات پر جھڑپیں ہوئیں۔

پورٹو والارٹا شہر میں جلاؤ گھیراؤ کے بعد فضا دھویں سے بھر گئی اور شہریوں میں خوف و ہراس پھیل گیا۔

غیر ملکی میڈیا کے مطابق پرتشدد واقعات میں نیشنل گارڈ کے 25 ارکان ہلاک جبکہ سات ریاستوں سے 70 افراد کو گرفتار کیا گیا ہے۔

وائٹ ہاؤس  کے ترجمان کا کہنا ہے کہ اس فوجی کارروائی میں امریکا نے انٹیلی جنس معاونت فراہم کی۔ امریکی صدر ڈونلڈ ٹرمپ  نے میکسیکو پر زور دیا ہے کہ منشیات فروش گروہوں کے خلاف کارروائیاں مزید تیز کی جائیں۔