پاکستان سمیت 8 ممالک کا اسرائیلی بستیوں کیخلاف برطانوی پابندیوں کا خیر مقدم

اسلام آباد: پاکستان، ترکیہ، مصر، انڈونیشیا، اردن، قطر، سعودی عرب اور متحدہ عرب امارات نے ایک مشترکہ اعلامیے میں مقبوضہ فلسطینی علاقوں میں قائم غیر قانونی اسرائیلی بستیوں سے مصنوعات کی درآمدات پر برطانیہ کی جانب سے عائد کی گئی پابندیوں کا گرم جوشی سے خیرمقدم کیا ہے۔ترجمان دفتر خارجہ کی جانب سے جاری تفصیلات کے مطابق 8 اسلامی ممالک نے غیر قانونی اسرائیلی بستیوں سے منسلک خدمات، تجارت اور وہاں متحرک افراد اور تنظیموں پر برطانوی پابندیوں کو سراہا ہے اور عالمی برادری سے مطالبہ کیا ہے کہ وہ بھی غیر قانونی بستیوں کے خلاف اسی نوعیت کے موثر و عملدارانہ اقدامات کرے۔

احتساب اور عالمی اقدامات: غیر قانونی اسرائیلی بستیوں میں سرگرم افراد، کمپنیوں اور تنظیموں کا سخت احتساب کیا جائے اور ان بستیوں سے ہر قسم کی تجارت پر مکمل پابندی کے لیے دنیا بھر میں ٹھوس اقدامات اٹھائے جائیں۔

عالمی قوانین کی خلاف ورزی: اسرائیلی آبادکاری کی تمام تر سرگرمیاں بین الاقوامی قوانین، اقوام متحدہ کی سلامتی کونسل کی قرارداد 2334 اور عالمی عدالت انصاف (ICJ) کی مشاورت کی خلاف ورزی ہیں، جو اسرائیلی قبضے کو مکمل غیر قانونی قرار دیتی ہیں۔

جغرافیائی و آبادیاتی تبدیلی کا خاتمہ: اسرائیل مقبوضہ فلسطینی علاقوں کی جغرافیائی اور آبادیاتی (ڈیموگرافک) حیثیت کو تبدیل کرنے کے لیے اٹھائے گئے تمام اقدامات کو فوری طور پر واپس لے اور ان سرگرمیوں کا خاتمہ کرے۔

غزہ اور امن منصوبہ: غزہ مقبوضہ فلسطینی علاقے کا ایک لازمی اور ناقابلِ تنسیخ حصہ ہے۔ غزہ میں تنازع کے خاتمے، پائیدار سکیورٹی، استحکام، انسانی امداد کی فراہمی اور تعمیرِ نو کو یقینی بنانے کے لیے امریکی صدر ڈونلڈ ٹرمپ کے جامع امن منصوبے پر فوری اور مکمل عملدرآمد کیا جائے۔

دو ریاستی حل: خطے میں دائمی و جامع امن کا واحد اور پائیدار طریقہ دو ریاستی حل ہی ہے۔ 4 جون 1967 کی سرحدوں پر مبنی آزاد، خودمختار اور قابلِ عمل فلسطینی ریاست کا قیام عمل میں لایا جائے جس کا دارالحکومت مشرقی یروشلم ہو۔