سپانتک چوٹی پر جاں بحق ڈاکٹر اسما مشتاق کی لاہور میں نماز جنازہ ادا

گلگت بلتستان میں واقع  بلند معروف ‘سپانتک چوٹی’ (گولڈن پیک) کو کامیابی سے سر کرنے کے بعد واپسی کے دوران حادثے کا شکار ہو کر جاں بحق ہونے والی خاتون کوہ پیما ڈاکٹر اسماء مشتاق کی نمازِ جنازہ لاہور میں ادا کر دی گئی ہے۔ نمازِ جنازہ میں متوفیہ کے لواحقین، کوہ پیماؤں، دوستوں اور شہریوں کی کثیر تعداد نے شرکت کی۔ برطانیہ میں مقیم ڈاکٹر اسماء مشتاق کا تعلق بنیادی طور پر لاہور سے تھا اور وہ کوہ پیمائی کی بے پناہ شوقین تھیں۔

ذرائع کے مطابق ڈاکٹر اسماء مشتاق نے 20 اگست کو سپانتک چوٹی کی سمٹ (سر) مکمل کی تھی، تاہم واپسی کے دشوار گزار سفر کے دوران وہ 6 ہزار 400 میٹر کی بلندی پر حادثاتی طور پر جاں بحق ہو گئی تھیں۔ شدید خراب موسم اور مشکلات کے باوجود مقامی رضاکار کوہ پیماؤں اور ریسکیو ٹیموں نے انتھک محنت کے بعد 31 اگست کو ان کی میت کو بیس کیمپ اور بعد ازاں ان کے آبائی شہر لاہور منتقل کیا، جہاں انہیں سسکیوں اور آہوں کے ساتھ سپردِ خاک کر دیا گیا۔