مودی کے ویڈیو پیغام پر بالی وڈ اداکارہ دیا مرزا کا شدید برہمی کا اظہار

بھارت میں نیٹ (NEET) امتحانات میں مبینہ بے ضابطگیوں اور پیپر لیکس کے خلاف نئی دہلی کے جنتر منتر پر جاری طلبہ کے مظاہروں پر بھارتی وزیراعظم نریندر مودی کے ویڈیو پیغام پر بالی وڈ اداکارہ دیا مرزا نے شدید برہمی اور مایوسی کا اظہار کیا ہے۔

بالی وڈ اداکارہ دیا مرزا نے اپنے انسٹاگرام اکاؤنٹ پر ٹوٹے ہوئے دل کے ایموجی کے ساتھ ایک جذباتی نوٹ شیئر کیا۔ وزیراعظم نریندر مودی کو مخاطب کرتے ہوئے اداکارہ نے لکھا، “جناب! ان والدین کے لیے ہمدردی کا ایک لفظ بھی نہیں جن کے بچے اپنی جان سے ہاتھ دھو بیٹھے، اور نہ ہی ان طلبہ اور سونم وانگچک کے لیے کوئی جذبہ جو ہفتوں سے شدید بھوک ہڑتال پر بیٹھے تھے۔” انہوں نے مزید لکھا کہ آپ کو اس معاملے پر کچھ کہنے میں ۴۷ دن لگ گئے اور جب آپ بولے تو درحقیقت کچھ بھی نہیں کہا، ایسا کچھ بھی نہیں جو ان لاکھوں متاثرہ اور ٹوٹے ہوئے دلوں کی تلافی کر سکے۔

واضح رہے کہ نئی دہلی میں طلبہ کے مسلسل احتجاجی مظاہروں اور معروف سماجی کارکن سونم وانگچک کی بھوک ہڑتال کے بعد وزیراعظم نریندر مودی نے ایک ویڈیو پیغام کے ذریعے دعویٰ کیا تھا کہ حکومت پیپر لیکس کے مجرموں کو سخت سزائیں دینے کے لیے فاسٹ ٹریک عدالتیں قائم کر رہی ہے۔ پی ایم مودی کا کہنا تھا کہ یہ مسئلہ لاکھوں طلبہ اور ان کے والدین کے لیے انتہائی تکلیف دہ ہے اور حکومت کی اولین ترجیح طلبہ کا قیمتی تعلیمی سال ضائع ہونے سے بچانا ہے۔