نائب وزیراعظم اسحاق ڈار برطانیہ کا دورہ مکمل کرکے ترکیہ پہنچ گئے

پاکستان کے نائب وزیراعظم اور وزیرِ خارجہ سینیٹر محمد اسحاق ڈار برطانیہ کا اہم دورہ مکمل کرنے کے بعد سرکاری مصروفیات کے سلسے میں ترکیہ کے شہر استنبول پہنچ گئے ہیں۔ وزارتِ خارجہ کے مطابق استنبول ایئرپورٹ پر ترک حکومت کے اعلیٰ حکام اور پاکستانی سفیر نے ان کا شاندار استقبال کیا۔ خوش آمدید کہنے والوں میں ترکیہ کے ڈپٹی چیف آف اسٹاف فار ایڈمنسٹریشن بریگیڈیئر جنرل شنول وارول، ترک وزارتِ خارجہ کے سفیر جہاد ایرگینے اور ترکیہ میں پاکستان کے سفیر ڈاکٹر یوسف جنید شامل تھے۔ پاکستان اور ترکیہ کے مابین قائم دہائیوں پر محیط گہرے سفارتی، تجارتی اور عسکری تعلقات کے تناظر میں سینیٹر اسحاق ڈار کا یہ دورہ دونوں برادر ممالک کے باہمی روابط کو مزید مضبوط بنانے کی ایک اہم کڑی تصور کیا جا رہا ہے۔