لمپی سکن ڈیزیز، بروسیلا ویکسینز کا عطیہ، چینی حکومت کا تعاون قابل تحسین ہے: رانا تنویر حسین

چین نے پاکستان کو مویشیوں کی بیماریوں لمپی سکن ڈیزیز (LSD) اور بروسیلا کے خلاف ویٹرنری ویکسینز کا عطیہ فراہم کر دیا ہے۔ وفاقی وزیر قومی غذائی تحفظ و تحقیق رانا تنویر حسین نے ویکسینز کی فراہمی سے متعلق منعقدہ تقریب میں شرکت کی اور چینی حکومت، وزارتِ زراعت و دیہی امور اور چینی سفارت خانے کا شکریہ ادا کیا۔ وفاقی وزیر نے کہا کہ پاک چین تعاون زراعت، لائیو سٹاک، اور سائنس و ٹیکنالوجی تک پھیلا ہوا ہے، اور یہ عطیہ ملک میں جانوروں کی بیماریوں سے بچاؤ اور کسانوں کے معاشی تحفظ کے لیے نہایت اہم ثابت ہو گا۔ انہوں نے مزید کہا کہ ویکسینز کے معیار، کولڈ چین اور مؤثر استعمال کو ریگولیٹری تقاضوں کے مطابق یقینی بنایا جائے گا جبکہ نیشنل ایگریکلچرل ریسرچ سینٹر (NARC) میں فیلڈ ڈیمونسٹریشن دونوں ممالک کے زرعی تعاون کا عملی ثبوت ہے۔