معاشی مفاد یا شہریوں کیخلاف اقدامات کرنے والے ملک کیخلاف جوابی کارروائی ہوگی، چین نے نیا قانون منظور کرلیا

چین نے اپنی خود مختاری، سلامتی اور معاشی مفادات کے تحفظ کے لیے ایک نیا قانون منظور کر لیا ہے، جس کے تحت بیرونی اقدامات کے خلاف سخت ردعمل دیا جا سکے گا۔

چینی وزیر اعظم لی کیانگ نے اس قانون پر دستخط کر دیے ہیں، جبکہ سرکاری میڈیا کے مطابق بیس شقوں پر مشتمل یہ قانون فوری طور پر نافذ العمل ہو گیا ہے۔

نئے قانون کے تحت اگر کوئی ملک چین کے معاشی مفادات، شہریوں یا اداروں کے خلاف اقدام کرتا ہے تو چینی حکومت کو اس کے جواب میں کارروائی کرنے کا اختیار حاصل ہوگا۔

اس کے علاوہ ایسے غیر ملکی افراد اور اداروں کی فہرست بھی تیار کی جائے گی جو چین کے خلاف اقدامات میں ملوث ہوں گے، اور ان کے خلاف بھی جوابی اقدامات کیے جا سکیں گے۔

ماہرین کے مطابق یہ قانون عالمی سطح پر چین کے مفادات کے تحفظ کو مزید مضبوط بنانے کے لیے اہم قدم قرار دیا جا رہا ہے۔