اسلام آباد میں فائر سیفٹی قوانین کی خلاف ورزی پر 8 عمارتیں سیل

کیپیٹل ڈویلپمنٹ اتھارٹی (سی ڈی اے) نے اسلام آباد بھر میں فائر سیفٹی قوانین کی خلاف ورزی کرنے والی عمارتوں کے خلاف سخت کارروائی کرتے ہوئے معائنوں کا دائرہ کار وسیع کر دیا ہے۔ اس مہم کے دوران فائر سیفٹی قوانین پر عمل درآمد نہ کرنے پر 8 اہم عمارتوں بشمول شہیدِ ملت سیکرٹریٹ، اسٹیٹ لائف بلڈنگ، ٹی ڈی اے پی بلڈنگ، بیورلے سینٹر، این آئی سی بلڈنگ، کراؤن پلازہ، خداداد ہائٹس اور انوائے کانٹی نینٹل ہوٹل کو سیل کر دیا گیا ہے۔ علاوہ ازیں سی ڈی اے حکام نے فائر سیفٹی کے ناقص انتظامات پر کیپیٹل ہسپتال، پولی کلینک اور پمز ہسپتال کو 5، 5 لاکھ روپے جرمانہ عائد کیا ہے۔ سی ڈی اے نے مالکان کو ایمرجنسی ایگزٹس اور فائر فائٹنگ آلات کی فوری دستیابی یقینی بنانے کی ہدایت دیتے ہوئے خبردار کیا ہے کہ عدم تعمیل پر مزید سخت قانونی کارروائی کی جائے گی۔