کیمبرج انٹرنیشنل ایجوکیشن کا اے ایس لیول ریاضی کا دوسرا پرچہ بھی لیک

شہرِ قائد سمیت ملک بھر کے کیمبرج طلبہ کے لیے پریشان کن خبر سامنے آئی ہے جہاں اے ایس لیول ریاضی کا دوسرا پرچہ بھی امتحان سے قبل لیک ہو گیا۔ آئی بی سی سی (IBCC) کے ایگزیکٹو ڈائریکٹر ڈاکٹر غلام علی ملاح نے اس واقعے کی تصدیق کرتے ہوئے کیمبرج انٹرنیشنل کے سیکیورٹی نظام پر گہری تشویش کا اظہار کیا ہے۔

 ڈاکٹر غلام علی ملاح کے مطابق کیمبرج کے امتحانی پرچے بار بار لیک ہونا ایک سنگین مسئلہ بن چکا ہے اور ادارہ اب تک امتحانی شفافیت کو یقینی بنانے میں ناکام رہا ہے۔کیمبرج نے تسلیم کیا کہ ریاضی کے پرچے 9709/12 کا مواد، جو 29 اپریل 2026 کو ایڈمنسٹریٹو زونز 3 اور 4 میں ہونا تھا، غیر مجاز طور پر وقت سے پہلے افشا کر دیا گیا تھا۔ تفصیلی تحقیقات کے بعد کیمبرج نے اس نتیجے پر پہنچا ہے کہ لیک ہونے والے پرچے کی بنیاد پر نتائج مرتب کرنا اب قابلِ اعتماد نہیں رہا، لہٰذا اس پرچے کو گریڈز کے تعین کے لیے استعمال نہیں کیا جائے گا۔کیمبرج انٹرنیشنل ایجوکیشن نے اعلان کیا ہے کہ تمام متاثرہ امیدواروں سے متبادل امتحان لیا جائے گا۔ ریاضی کے پیپر 9709/12 کا دوبارہ امتحان 9 جون 2026 کو موجودہ جون سیریز کے شیڈول کے مطابق منعقد کیا جائے گا۔ طلبہ کو ہدایت کی گئی ہے کہ وہ نئی تاریخ کے مطابق اپنی تیاری مکمل رکھیں۔