دبئی کا معروف ہوٹل برج العرب مرمت کیلئے ڈیڑھ سال بند رکھنے کا اعلان

دبئی کا عالمی شہرت یافتہ لگژری ہوٹل برج العرب کو بڑی مرمت کے باعث اٹھارہ ماہ کے لیے بند کرنے کا اعلان کردیا گیا ہے۔ ہوٹل انتظامیہ کے مطابق یہ 1999 میں افتتاح کے بعد پہلی بڑی بحالی کا منصوبہ ہے، جس میں عمارت کی منفرد ساخت اور تاریخی حیثیت کو برقرار رکھا جائے گا۔

برج العرب اپنی کشتی نما شکل اور شاندار تعمیراتی انداز کی بدولت دنیا بھر میں پہچانا جاتا ہے۔ اس ہوٹل کی تعمیر سے قبل سمندر میں ایک مصنوعی جزیرہ بنایا گیا تھا جو جمیرہ ساحل سے تقریباً 280 میٹر فاصلے پر واقع ہے، اور اس کی تیاری میں تقریباً تین سال کا عرصہ لگا۔

ہوٹل کے اندرونی حصوں میں چوبیس قیراط سونے کی تہہ بڑے پیمانے پر استعمال کی گئی ہے، جبکہ قیمتی پتھروں اور سنگ مرمر کی تقریباً تیس اقسام عمارت کو شاہانہ حیثیت دیتی ہیں۔ ماضی میں مہمانوں کو خصوصی سہولت کے طور پر سونے سے مزین ڈیجیٹل آلات بھی فراہم کیے جاتے رہے ہیں۔

برج العرب کا مشہور زیرِ آب طرز کا ریسٹورنٹ دراصل ایک بڑے آبی ذخیرے کے ذریعے بنایا گیا ہے جس میں مختلف اقسام کی مچھلیاں موجود ہیں، جو سمندر کے اندر ہونے کا احساس دلاتی ہیں۔

ہوٹل کے ہر کمرے کو دو منزلہ سوٹ کے طور پر ڈیزائن کیا گیا ہے جبکہ مہمانوں کے لیے مختلف اقسام کے تکیوں کا انتخاب بھی دستیاب ہوتا ہے۔ اس کے علاوہ بلند مقام پر قائم ہیلی پیڈ کو عالمی سطح کے کھیلوں اور تقریبات کے لیے بھی استعمال کیا جا چکا ہے۔

انتظامیہ کے مطابق مرمت کے دوران ہوٹل کی اصل شناخت اور تاریخی خصوصیات کو محفوظ رکھا جائے گا، تاہم جدید سہولیات میں مزید بہتری متوقع ہے۔ اب یہ دیکھنا اہم ہوگا کہ بحالی کے بعد اس کی روایات میں کیا تبدیلیاں سامنے آتی ہیں۔