فیصل آباد کے ضمنی الیکشن میں ضابطۂ اخلاق کی کھلم کھلا خلاف ورزیاں

فیصل آباد کے پانچ حلقوں میں ضمنی انتخابات کے دوران ضابطۂ اخلاق کی سنگین خلاف ورزیاں جاری ہیں۔ مختلف پولنگ اسٹیشنز میں موبائل فون کے ذریعے بیلٹ پیپرز کی ویڈیوز بنانے کے واقعات سامنے آئے ہیں جبکہ امیدواروں کے نام والی پرچیاں بھی پولنگ اسٹیشنز کے اندر تقسیم کی جاتی رہی ہیں۔
کئی مقامات پر خواتین بیلٹ پیپر ہاتھ میں تھامے پولنگ اسٹیشن کے باہر گھومتی دیکھی گئیں، جبکہ بعض فی میل پولنگ اسٹیشنز میں مرد بھی داخل ہو گئے اور آزادانہ طور پر ویڈیوز بناتے رہے۔ پولنگ عملہ اور سکیورٹی اہلکار انہیں روکنے میں مکمل ناکام دکھائی دیے۔این اے 96 اور پی پی 98 میں ووٹرز کی جانب سے پولنگ بوتھ کے اندر بیلٹ پیپر پر مہر لگانے کی ویڈیوز منظرِ عام پر آئیں۔ پی پی 116 کے فی میل پولنگ اسٹیشن میں اس وقت بدنظمی دیکھنے میں آئی جب سینیٹر رانا ثناء اللہ کی اہلیہ ووٹ کاسٹ کرنے پہنچیں تو مرد ووٹرز بھی اندر گھس گئے اور موبائل سے ریکارڈنگ کرتے رہے۔
الیکشن کمیشن نے موبائل فون کے استعمال سے متعلق شکایات پر ایکشن لیتے ہوئے تمام پریزائیڈنگ افسران کو ووٹرز کے موبائل استعمال پر فوری پابندی اور سخت نگرانی کی ہدایات جاری کر دی ہیں