بانی پی ٹی آئی کی ملاقاتیں کرائی جائیں، صوبوں کی تقسیم پر جلد بازی وفاق کے لیے خطرناک ہو گی: بیرسٹر گوہر

اسلام آباد: پاکستان تحریکِ انصاف (پی ٹی آئی) کے چیئرمین بیرسٹر گوہر علی خان نے سپریم کورٹ کے باہر میڈیا سے گفتگو کرتے ہوئے بانی پی ٹی آئی کی سیاسی قیادت و فیملی سے ملاقاتوں کی فراہمی، دہشت گردی پر قومی سنجیدگی اور صوبوں کے قیام کے حوالے سے محتاط آئینی طریقۂ کار پر زور دیا ہے۔

بیرسٹر گوہر نے کہا کہ منگل کا دن بانی پی ٹی آئی سے ملاقاتوں کا دن ہے، لہٰذا سیاسی قیادت بالخصوص علامہ راجہ ناصر عباس اور محمود خان اچکزئی کی ملاقات انتہائی ضروری ہے۔ انہوں نے بتایا کہ محمود خان اچکزئی نے الیکشن کمیشن کے معاملے پر وزیراعظم کو خط لکھا ہے جس کا فوری نوٹس لیا جانا چاہیے، جبکہ سیاسی مذاکرات کے معاملے پر محض پیشکش سے آگے بڑھ کر عملی پیش رفت ہونی چاہیے۔ انہوں نے کراچی میں وزیراعلیٰ خیبر پختونخوا کا شاندار استقبال کرنے پر عوام کا شکریہ ادا کرتے ہوئے کہا کہ رکاوٹوں کے باوجود عوام کا سڑکوں پر نکلنا اس بات کا ثبوت ہے کہ وہ موجودہ اسٹیٹس کو قبول کرنے کو تیار نہیں ہیں۔

دفاعی و سیکیورٹی صورتحال پر بات کرتے ہوئے بیرسٹر گوہر نے وزیراعلیٰ پنجاب مریم نواز کے دہشت گردی سے متعلق بیان کی شدید مذمت کی اور اسے متعصبانہ قرار دیتے ہوئے معافی کا مطالبہ کیا۔ انہوں نے کہا کہ پاکستان میں دہشت گردی کے پیچھے بھارتی خفیہ ایجنسی ’را‘ کا ہاتھ نکلتا ہے، جبکہ ہماری عوام اور افواج مسلسل قربانیاں دے رہی ہیں، لہٰذا اس حساس معاملے پر پوائنٹ اسکورنگ سے گریز کیا جائے۔ نئے صوبوں کی تشکیل پر ان کا کہنا تھا کہ عوامی مرضی کے بغیر سندھ، پنجاب یا بلوچستان کی تقسیم سے وفاق کمزور ہوگا اور 18ویں ترمیم کی طرز پر وسیع تر قومی مشاورت کے بغیر جلد بازی میں کیا گیا کوئی بھی فیصلہ ملک کی یکجہتی کے خلاف ہوگا۔