بنگلہ دیش، عام انتخابات میں پولنگ کے بعدووٹوں کی گنتی جاری

بنگلادیش کے عام انتخابات میں پولنگ کا عمل مکمل ہونے کے بعد ووٹوں کی گنتی جاری ہے۔ بنگلادیش نیشنلسٹ پارٹی (بی این پی) اور بنگلادیش جماعتِ اسلامی  کی قیادت میں قائم اتحاد کے درمیان سخت مقابلہ متوقع ہے۔

بنگلہ دیش میں  13ویں  قومی پارلیمانی انتخابات طلبہ کی قیادت میں چلنے والی تحریک کے 18 ماہ بعد ہو رہے ہیں۔ اس تحریک کے نتیجے میں شیخ حسینہ واجد کے بیس سالہ اقتدار کا خاتمہ ہوگیاتھا۔

بنگلادیش الیکشن کمیشن کے حکام کے مطابق ووٹوں کی گنتی میں زیادہ وقت لگ سکتا ہے کیونکہ اس میں سفید رنگ کے پارلیمانی بیلٹ پیپر کے ساتھ ساتھ جولائی کے قومی چارٹر سے متعلق ریفرنڈم کے لیے گلابی بیلٹ پیپر بھی شامل ہیں، اس کے علاوہ سیاسی جماعتوں اور امیدواروں کی تعداد بھی زیادہ ہے۔

الیکشن کمیشن کے مطابق ملک کے 64 اضلاع میں قائم 42 ہزار 761 پولنگ اسٹیشنز پر 300 میں سے 299 پارلیمانی حلقوں کے لیے ووٹنگ ہوئی۔ خواتین کی نمائندگی کے لیے 50 مخصوص نشستیں مختص ہیں۔ بنگلادیش کی پارلیمنٹ ایک ایوان پر مشتمل ہے جسے جاتیا سنگسد کہا جاتا ہے اور اس کے مجموعی طور پر 350 ارکان ہوتے ہیں۔ ان میں سے 300 ارکان براہِ راست انتخاب کے ذریعے منتخب ہوتے ہیں جبکہ باقی 50 نشستیں خواتین کے لیے مخصوص ہیں۔

نومبر 2025 میں جاری کردہ حتمی ووٹر لسٹ کے مطابق بنگلہ دیش میں رجسٹرڈ ووٹرز کی تعداد 12 کروڑ 77 لاکھ 11 ہزار 793 ہے، جن میں 6 کروڑ 48 لاکھ 25 ہزار 361 مرد اور 6 کروڑ 28 لاکھ 85 ہزار 200 خواتین ووٹر شامل ہیں۔یہ پہلا موقع ہے کہ ڈاک کے ذریعے ووٹنگ کی سہولت فراہم کی گئی ہے، جس سے تقریباً ڈیڑھ کروڑ بیرونِ ملک مقیم محنت کش مستفید ہوئے۔