سکیورٹی فورسز کی بلوچستان میں کارروائیاں، بھارتی حمایت یافتہ 11 دہشت گرد ہلاک

پاک فوج کے شعبہ تعلقاتِ عامہ (آئی ایس پی آر) کے مطابق سیکیورٹی فورسز نے بلوچستان کے اضلاع خاران اور واشک میں کامیاب انٹیلی جنس بیسڈ آپریشنز (IBOs) کے دوران بھارتی پراکسی کالعدم تنظیمی نیٹ ورک ’فتنہ الہندوستان‘ سے تعلق رکھنے والے 11 خطرناک دہشت گردوں کو جہنم واصل کر دیا ہے۔ آئی ایس پی آر کی فراہم کردہ تفصیلات کے مطابق، یہ کارروائیاں 6 اور 7 ستمبر کی درمیانی شب کی گئیں۔ خاران میں دہشت گردوں نے عام شہریوں کی نقل و حرکت متاثر کرنے کے لیے سڑک بلاک کرنے کی کوشش کی، جس پر سیکیورٹی فورسز نے فوری اور مؤثر جوابی پیش قدمی کرتے ہوئے بھارتی سرپرستی میں سرگرم 8 دہشت گردوں کو موقع پر ہی ہلاک کر دیا۔

دوسرا اہم آپریشن ضلع واشک میں انجام دیا گیا جہاں سیکیورٹی فورسز نے انٹیلی جنس معلومات پر دہشت گردوں کے ایک خفیہ ٹھکانے کو گھیرے میں لے کر مکمل طور پر تباہ کر دیا۔ شدید فائرنگ کے تبادلے کے بعد وہاں موجود 3 دہشت گرد ہلاک کر دیے گئے، جبکہ ٹھکانے سے 2.9 ٹن (تقریباً 2900 کلوگرام) ہائی ایکسپلوسیو دھماکا خیز مواد بھی برآمد ہوا جو دیسی ساختہ بم (IEDs) بنانے کے لیے استعمال کیا جا رہا تھا۔ آئی ایس پی آر نے عزم کا اعادہ کیا ہے کہ ’عزمِ استحکام‘ کے تحت ملک سے غیر ملکی سرپرستی میں ہونے والی دہشت گردی کے مکمل خاتمے کے لیے انسدادِ دہشت گردی مہم اور کلیئرنس آپریشنز پوری قوت اور رفتار سے جاری رہیں گے۔