ایف سی ہیڈکوارٹرز پر حملہ قابل مذمت، خوارج کا خاتمہ ترجیح ہے: صدر، وزیراعظم

وزیرِاعظم محمد شہباز شریف نے پشاور میں فیڈرل کانسٹیبلری کے ہیڈ کوارٹر پر دہشت گرد حملے کی سخت مذمت کرتے ہوئے کہا ہے کہ سیکیورٹی فورسز کی بروقت اور مؤثر کارروائی کی بدولت بڑے سانحے سے محفوظ رہے۔
وزیراعظم نے زخمیوں کو فوری اور بہترین طبی امداد فراہم کرنے کی ہدایت کی ہے اور ان کی جلد صحتیابی کے لیے دعا بھی کی ہے۔
وزیرِاعظم نے متعلقہ اداروں کو ہدایت کی کہ واقعے کے ذمہ دار عناصر کی فوری شناخت کرکے انہیں کیفرِ کردار تک پہنچایا جائے۔
انہوں نے اس عزم کا اعادہ کیا کہ پاکستان کی سالمیت پر حملہ کرنے والے دہشت گردوں کے مذموم عزائم کو ناکام بنایا جائے گا۔ وزیراعظم نے واضح کیا کہ حکومت پاکستان ملک سے دہشت گردی کے مکمل خاتمے کے لیے پوری طرح پرعزم ہے

صدرِ مملکت آصف علی زرداری نے پشاور میں فیڈرل کانسٹیبلری ہیڈکوارٹر پر فتنۂ خوارج کے بزدلانہ حملے کی شدید مذمت کی ہے۔ صدر نے سانحے میں شہید ہونے والے اہلکاروں کے لواحقین سے دلی تعزیت اور ہمدردی کا اظہار کرتے ہوئے شہداء کے بلند درجات اور زخمیوں کی جلد صحت یابی کے لیے دعا کی۔
صدر آصف علی زرداری کا کہنا تھا کہ یہ حملہ وطنِ عزیز کے خلاف بیرونی پشت پناہی میں سرگرم خارجی دہشت گردوں کی بزدلانہ کارروائی ہے۔ انہوں نے واضح کیا کہ بیرونی سرپرستی میں سرگرم خوارج کی دہشت گردی کا مکمل خاتمہ ریاست کی اولین ترجیح ہے اور اس مقصد کے حصول کے لیے تمام وسائل بروئے کار لائے جائیں گے۔صدرِ مملکت نے سیکیورٹی فورسز اور پولیس کی بروقت، جرات مندانہ اور مؤثر کارروائی کو بھی خراجِ تحسین پیش کیا اور دہشت گردی کے خلاف بھرپور عزم کا اعادہ کیا