پہلگام واقعہ فالس فلیگ آپریشن تھا، بھارت تحقیقات سے بھاگ گیا: عطا تارڑ

وفاقی وزیر اطلاعات و نشریات عطا اللہ تارڑ نے کہا ہے کہ پاکستان دہشت گردی کے خلاف جنگ میں عالمی سطح پر فرنٹ لائن ریاست کا کردار ادا کر رہا ہے اور اس ضمن میں دی جانے والی قربانیاں ناقابلِ فراموش ہیں۔ انسٹیٹیوٹ آف سٹریٹجک اسٹڈیز اسلام آباد میں ’معرکۂ حق‘ کے حوالے سے منعقدہ سیمینار سے خطاب کرتے ہوئے انہوں نے پہلگام واقعے کو بھارت کا ‘فالس فلیگ آپریشن’ قرار دیا۔ عطا تارڑ کا کہنا تھا کہ پہلگام سرحد سے دور اور بھارتی فوج کے سخت کنٹرول والا علاقہ ہے، اس کے باوجود پاکستان پر الزامات لگائے گئے جبکہ بھارت کسی بھی غیر جانبدار تحقیقات سے خود پیچھے ہٹ گیا۔

وفاقی وزیر نے مزید کہا کہ بھارت اپنے داخلی مسائل اور ناکامیوں کا ملبہ پاکستان پر ڈال کر عالمی برادری کو گمراہ کرنے کی کوشش کرتا ہے۔ انہوں نے واضح کیا کہ پاکستان کی سول اور عسکری قیادت ایک صفحے پر ہے اور ریاستی اداروں کی یکسوئی ہی ملک کی سب سے بڑی طاقت ہے۔ ان کا کہنا تھا کہ جو ملک پاکستان پر الزامات لگا رہا ہے، وہ خود کینیڈا سمیت دیگر ممالک میں سکھ رہنماؤں کے قتل اور کلبھوشن یادیو جیسے نیٹ ورک کے ذریعے دہشت گردی میں ملوث پایا گیا ہے۔ انہوں نے کشمیریوں کے حقِ خودارادیت کی حمایت کا اعادہ کرتے ہوئے عالمی برادری سے مطالبہ کیا کہ وہ یو این قراردادوں کے مطابق مسئلہ کشمیر کے حل کے لیے اپنا کردار ادا کرے۔