گلگت بلتستان میں عوامی مینڈیٹ چھینا گیا، معاملہ قومی اسمبلی میں اٹھائیں گے: اسد قیصر

تحریک انصاف کے رہنما اسد قیصر نے کہا ہے کہ گلگت بلتستان انتخابات میں ان کی جماعت کے ساتھ ناانصافی کی گئی اور عوامی مینڈیٹ کو تسلیم نہیں کیا گیا۔

اپنے بیان میں اسد قیصر نے گلگت بلتستان کے عوام کا شکریہ ادا کرتے ہوئے کہا کہ انہوں نے بانی تحریک انصاف کا بھرپور ساتھ دیا۔ ان کا دعویٰ تھا کہ موصول ہونے والی اطلاعات کے مطابق تحریک انصاف بیس تک نشستوں پر کامیابی حاصل کرچکی ہے۔

انہوں نے الزام عائد کیا کہ مختلف حربوں اور ہتھکنڈوں کے ذریعے تحریک انصاف کے ساتھ دوبارہ آٹھ فروری جیسا سلوک کیا گیا اور جماعت کا مینڈیٹ چھینا گیا۔

اسد قیصر کا کہنا تھا کہ موجودہ طرز حکمرانی مزید نہیں چل سکتا، حکومت نے ملک میں افراتفری اور عدم استحکام کو فروغ دیا ہے جبکہ کوئی بھی طبقہ اس کے اثرات سے محفوظ نہیں رہا۔

انہوں نے کہا کہ عوام کا غصہ ایک حد تک پہنچ چکا ہے اور تحریک انصاف عوام کی آواز بنے گی۔ ان کے بقول گلگت بلتستان کے عوام کا مقدمہ قومی اسمبلی میں بھی بھرپور انداز میں لڑا جائے گا۔