عمران خان اور بشریٰ بی بی کے خلاف تمام کیسز واپس لیے جائیں: اسد قیصر

پاکستان تحریک انصاف (پی ٹی آئی) کے مرکزی رہنما اسد قیصر نے مشاورتی کانفرنس کے دوران ایک قرارداد پیش کرتے ہوئے بانی پی ٹی آئی عمران خان اور ان کی اہلیہ بشریٰ بی بی کے خلاف قائم تمام مقدمات فوراً واپس لینے کا مطالبہ کیا ہے۔ کانفرنس سے خطاب میں انہوں نے کہا کہ سپریم کورٹ کے فیصلے کی توہین پر وزراء کے خلاف توہینِ عدالت کی کارروائی کر کے قرار واقعی سزا دی جائے تاکہ عدلیہ کی توقیر اور آزادی کا پیغام دنیا بھر میں جائے۔ اسد قیصر نے خیبر پختونخوا کے مسائل پر بات کرتے ہوئے کہا کہ صوبے میں حکومت کے باوجود پی ٹی آئی کو حقِ حکمرانی نہیں دیا جا رہا اور این ایف سی ایوارڈ میں آئینی حصہ بھی التوا کا شکار ہے۔ انہوں نے گندم کے بحران پر وفاقی و پنجاب حکومت کی حکمتِ عملی کو تنقید کا نشانہ بناتے ہوئے الزام لگایا کہ اس بدانتظامی سے کسانوں کو 900 ارب روپے کا بھاری نقصان پہنچا ہے۔