یوم دفاع و شہدائے پاکستان کے موقع پر مسلح افواج کا شہدائے وطن کو خراجِ عقیدت

یومِ دفاع و شہدائے پاکستان (6 ستمبر) کے موقع پر مسلح افواج نے ملک و قوم کی سلامتی کے لیے اپنی جانوں کا نذرانہ پیش کرنے والے شہدائے وطن کو زبردست خراجِ عقیدت پیش کیا ہے۔ انٹر سروسز پبلک ریلیشنز (آئی ایس پی آر) کے مطابق فیلڈ مارشل سید عاصم منیر، ایئر چیف اور نیول چیف نے شہداء کو سلام پیش کرتے ہوئے غازیوں اور ان کے اہلخانہ سے گہرے اظہارِ تشکر اور احترام کا اظہار کیا۔ ترجمان پاک فوج نے اپنے بیان میں 6 ستمبر کو قومی اتحاد، جرات اور عزم کی لازوال علامت قرار دیا اور کہا کہ 1965ء کی جنگ میں قوم اور دفاعی افواج نے متحد ہو کر مادرِ وطن کا تحفظ کیا۔ آئی ایس پی آر نے مزید کہا کہ ارضِ پاک کے محافظوں نے زمین، فضا اور سمندر میں ناقابلِ فراموش قربانیاں رقم کیں، جبکہ شہدا کے لواحقین صابر، باحوصلہ اور ملک کی ثابت قدمی کی دائمی علامت ہیں۔