بانی پی ٹی آئی کی آنکھ ضائع ہو چکی، فوری علاج کرایا جائے”؛ علیمہ خان کا اڈیالہ جیل کے باہر دھرنا دینے کا اعلان

راولپنڈی میں اڈیالہ جیل کے قریبی ناکے پر میڈیا سے گفتگو کرتے ہوئے بانی پی ٹی آئی کی ہمشیرہ علیمہ خان نے ملک کی سیاسی اور معاشی صورتحال سمیت بانی پی ٹی آئی کی صحت کے حوالے سے سنگین تحفظات کا اظہار کیا۔ انہوں نے بتایا کہ عدالتی پیشیوں کے نام پر انہیں ہراساں کیا جا رہا ہے، جبکہ عدالتوں میں خود جج اور پراسیکیوٹر غائب ہوتے ہیں۔ علیمہ خان نے بانی پی ٹی آئی کی صحت کے بارے میں تشویشناک دعویٰ کیا کہ ان کی ایک آنکھ ضائع ہو چکی ہے، لہٰذا حکومت فوری طور پر ان کا علاج معالجہ یقینی بنائے۔ انہوں نے موجودہ انتظامیہ کو آڑے ہاتھوں لیتے ہوئے کہا کہ حکومت نے ملک کو معاشی طور پر تباہ کر دیا ہے اور سیاسی انتقام کے لیے تمام راستے مسدود کر دیے ہیں۔ علیمہ خان نے دوٹوک موقف اختیار کیا کہ اگر پچھلے منگل کے وعدے کے مطابق آج ان کی ملاقات نہ کرائی گئی تو وہ کارکنوں کے ہمراہ وہیں احتجاجاً بیٹھ جائیں گی۔ انہوں نے مزید کہا کہ بانی پی ٹی آئی ہی وہ واحد لیڈر ہیں جو پاکستان اور افغانستان کے معاملات کو سمجھداری سے حل کر کے خطے میں امن لا سکتے ہیں، اور خیبر پختونخوا میں جاری دہشت گردی کا حل بھی بانی کی رہائی اور ان کی ہدایات میں پنہاں ہے۔