آزاد کشمیر حکومت کا 100 روزہ اصلاحاتی ایجنڈے پر عملدرآمد کا اعلان

وزیراعظم آزاد کشمیر افتخار گیلانی نے اپنی حکومت کے پہلے اجلاس کی صدارت کرتے ہوئے 100 روزہ اصلاحاتی ایجنڈے پر فوری عملدرآمد کا اعلان کیا ہے۔ وزیراعظم سیکرٹریٹ میں منعقدہ اعلیٰ سطح کے اجلاس میں چیف سیکرٹری خوشحال خان سمیت تمام محکموں کے سیکرٹریز نے شرکت کی۔ وزیراعظم افتخار گیلانی نے بیوروکریسی کو ہدایت کی کہ عام آدمی کو فوری ریلیف فراہم کرنے، روزگار کے نئے مواقع پیدا کرنے، نوجوانوں کے لیے ہنر مند پروگرام شروع کرنے، اور صحت و سفری سہولیات میں بہتری کے لیے عملی اقدامات کیے جائیں۔ انہوں نے واضح کیا کہ حکومت کی کارکردگی محض اعلانات تک محدود نہیں رہے گی بلکہ اس کے اثرات گراؤنڈ پر نظر آئیں گے۔ انہوں نے مزید کہا کہ یہ 100 روزہ ایجنڈا مسلم لیگ (ن) کی مرکزی قیادت کی آزاد کشمیر کی فلاح و گڈ گورننس میں سنجیدگی کا عکاس ہے۔