ڈی آئی جی سی ٹی ڈی سجاد حسین حکومتی احکامات کی عدم تعمیل پر معطل

آزاد جموں و کشمیر حکومت نے حکومتی احکامات کی عدم تعمیل، سرکاری امور کی انجام دہی میں غفلت اور لاپرواہی کے مرتکب ہونے پر ڈی آئی جی کاؤنٹر ٹیررازم ڈیپارٹمنٹ (سی ٹی ڈی) سجاد حسین کو فوری طور پر ملازمت سے معطل کر دیا ہے۔ محکمہ سروسز اینڈ جنرل ایڈمنسٹریشن کی جانب سے جاری کردہ نوٹیفکیشن کے مطابق یہ کارروائی آزاد جموں و کشمیر سول سروسز (ایفیشینسی اینڈ ڈسپلن) رولز 1977ء کے قاعدہ 6(1) کے تحت کی گئی ہے۔ معطلی کے عرصے کے دوران ڈی آئی جی سجاد حسین کو سروسز اینڈ جنرل ایڈمنسٹریشن ڈیپارٹمنٹ کے ساتھ منسلک (اٹیچ) کر دیا گیا ہے۔ نوٹیفکیشن میں کہا گیا ہے کہ فیصلے کا اطلاق فوری طور پر ہو گا اور تمام متعلقہ حکام کو کارروائی کے لیے نقل ارسال کر دی گئی ہے۔