لاہور: شاہی قلعے کا اکبری دروازہ دو صدیوں بعد عوام کیلئے کھولنے کی تیار، بحالی مکمل

لاہور کے تاریخی شاہی قلعے کا تقریباً دو صدیوں سے بند پڑا اکبری دروازہ شاندار طریقے سے بحال کر دیا گیا ہے، اور اسے رواں سال دسمبر میں سیاحوں اور عام شہریوں کے لیے کھولنے کے لیے تمام تیاریاں حتمی مراحل میں داخل ہو چکی ہیں۔

مغل بادشاہ جلال الدین اکبر کے دورِ حکومت میں تعمیر ہونے والا شاہی قلعے کا یہ اکبری دروازہ برطانوی عہدِ حکومت میں بند کر دیا گیا تھا، تاہم 2023ء میں شروع کیے جانے والے تاریخی بحالی منصوبے کے تحت نہ صرف اس اساطیری عمارت کو اس کے اصل اور قدیم طرزِ تعمیر کے مطابق بحال کیا گیا ہے بلکہ اسے سیاحتی اور عوامی سرگرمیاں بحال کرنے کے لیے بھی مکمل طور پر تیار کر لیا گیا ہے۔

قلعے کے مشرقی حصے میں واقع اکبری دروازہ مغل دورِ حکومت میں اندرونِ شہر کو شاہی قلعے کے ساتھ براہِ راست منسلک کرنے کے لیے تعمیر کیا گیا تھا، اور اسی تاریخی راستے سے عام شہری، تاجر اور شاہی وفود قلعے کے اندر داخل ہوا کرتے تھے۔ ڈائریکٹر کنزرویشن وجاہت علی خان کے مطابق اکبری دروازہ قلعے کی ابتدائی تعمیرات میں بنیادی حیثیت رکھتا ہے، جس کے بعد قلعے کی حدود کو مشرق سے مغرب کی طرف توسیع دی گئی اور بعد کے ادوار میں دوسرے دروازے تعمیر کیے گئے، تاہم برطانوی حکومت نے اپنی انتظامی پالیسی اور طاقت کے اظہار کے لیے اس تاریخی دروازے کو مستقل طور پر بند کر دیا تھا۔

یہ بحالی کا اہم منصوبہ پنجاب والڈ سٹیز اینڈ ہیریٹیج ایریاز اتھارٹی، فرانسیسی ترقیاتی ایجنسی (AFD) اور آغا خان کلچرل سروس پاکستان کے باہمی اشتراک سے کامیابی کے ساتھ مکمل کیا گیا ہے۔ بحالی کے کام کے دوران جب سکھ اور برطانوی ادوار میں کی گئی پلستر کی ناپائیدار تہیں ہٹائی گئیں تو وہاں سے انتہائی نایاب قدیم فریسکو مصوری دریافت ہوئی، جس میں ہندو دیوتاؤں کی تصاویر بھی شامل ہیں، اور ان تاریخی تصاویر کو محفوظ بنانے کے لیے خصوصی تکنیکی اقدامات کیے گئے ہیں۔

پراجیکٹ انجینئر یاسر علی نے بتایا کہ طویل عرصے تک بند رہنے کی وجہ سے لکڑی کا بھاری بھرکم مرکزی دروازہ جام اور مکمل طور پر غیر متوازن ہو گیا تھا، جس کی مہارت سے مرمت کر کے اسے دوبارہ فعال اور قابلِ استعمال بنایا گیا ہے۔ اس کے علاوہ رم مارکیٹ کی جانب سے قلعے تک رسائی کو مزید بہتر بنانے کے لیے نیا راستہ اور سلوپ بھی تعمیر کیا گیا ہے، جبکہ صحن میں کھدائی کے دوران قدیم زمانے کا ایک بہترین نکاسی آب کا نظام بھی دریافت ہوا ہے، جسے اس بحالی پراجیکٹ کا حصہ بنایا گیا ہے۔

اس منصوبے کے تحت عمارت کی زیریں منزل پر زائرین کی سہولت کے لیے ٹکٹ گھر کا کیبن، پہلی منزل پر تاریخی تصاویر اور نایاب دستاویزات کی گیلری، جبکہ سکیورٹی کے لیے سی سی ٹی وی مانیٹرنگ روم قائم کیا جائے گا، اس کے علاوہ معذور افراد کے لیے وہیل چیئر ریمپ اور پارکنگ کی شاندار سہولت بھی فراہم کی جا رہی ہے۔

شاہی قلعے کے انچارج اویس رضا کے مطابق اکبری دروازے کو رواں سال دسمبر میں باضابطہ طور پر کھولنے کے بعد شہری اسی تاریخی راستے سے بھی قلعے کے اندر داخل ہو سکیں گے۔ تاریخی عمارتوں کو محفوظ بنانے کے ساتھ ساتھ انہیں گیلریوں، کیفے اور دیگر عوامی سہولتوں کے لیے استعمال کرنے پر بھی تیزی سے کام جاری ہے، جس سے نہ صرف سیاحت کو فروغ ملے گا بلکہ مقامی سطح پر معاشی سرگرمیوں کے نئے مواقع بھی پیدا ہوں گے۔ حکومتی حکام کے مطابق اکبری دروازے کی یہ بحالی لاہور قلعے کے شاندار تاریخی ورثے کو محفوظ بنانے اور اس کے ان پوشیدہ حصوں کو دوبارہ عوام کی رسائی میں لانے کی ایک اہم کوشش ہے جو طویل عرصے سے بند یا غیر فعال چلے آ رہے تھے۔