46 ویں پاکستان آرمی رائفل ایسوسی ایشن سینٹرل میٹ کی اختتامی تقریب، فیلڈ مارشل عاصم منیر کی شرکت

پاک فوج کے شعبہ تعلقات عامہ (آئی ایس پی آر) کے مطابق آرمی مارکس مین شپ یونٹ جہلم میں 46 ویں پاکستان آرمی رائفل ایسوسی ایشن (PARA) سینٹرل میٹ کی اختتامی تقریب منعقد ہوئی۔ فیلڈ مارشل سید عاصم منیر نے بطور مہمانِ خصوصی شرکت کی جبکہ چیف آف دی نیول اسٹاف ایڈمرل نوید اشرف بھی تقریب میں موجود تھے، جنہوں نے نمایاں پوزیشن حاصل کرنے والے نشانہ بازوں میں ٹرافیاں اور میڈلز تقسیم کیے۔ 7 اکتوبر سے 11 نومبر تک جاری رہنے والے ان مقابلوں میں 1500 سے زائد نشانہ بازوں اور مسلح افواج سمیت صوبائی ٹیموں نے حصہ لیا، جس میں چوتھی انٹر سروسز کامبیٹ شوٹنگ چیمپئن شپ پاکستان آرمی نے اپنے نام کی۔ اس موقع پر فوجی نشانہ بازی کا اعلیٰ ترین اعزاز ‘ماسٹر ایٹ آرمز ٹرافی’ پنجاب رجمنٹ کے حوالدار فضل الرحمان کو دیا گیا، جبکہ فیلڈ مارشل عاصم منیر نے نشانہ بازوں کی مہارت کو سراہتے ہوئے چھوٹے ہتھیاروں کی درست نشانے بازی کو بنیادی فوجی تربیت کا لازمی حصہ قرار دیا۔