موسمیاتی بحران سے نمٹنے کے لیے عملی اقدامات ناگزیر ہیں، اردوان

ترک صدر رجب طیب اردوان نے کہا ہے کہ دنیا کو اس وقت گلوبل وارمنگ، حیاتیاتی تنوع میں کمی، غذائی عدم تحفظ اور شدید موسمیاتی واقعات جیسے سنگین چیلنجز کا سامنا ہے۔ انطالیہ میں کوپ 31 (COP31) سربراہی اجلاس سے خطاب کرتے ہوئے ترک صدر نے امید ظاہر کی کہ یہ کانفرنس موسمیاتی تبدیلی کے خلاف عالمی جنگ میں اہم موڑ ثابت ہوگی، کیونکہ شدید موسمیاتی اثرات سے دنیا کا کوئی بھی ملک محفوظ نہیں ہے۔ انہوں نے زور دیا کہ ماحولیاتی نقصان سے متاثرہ غریب ممالک کی مالی و تکنیکی مدد کو یقینی بنایا جائے، اور موسمیاتی بحران سے نمٹنے کے لیے محض بیانات کے بجائے عملی اقدامات کیے جائیں۔ رجب طیب اردوان نے واضح کیا کہ ترکیہ نے قابلِ تجدید توانائی اور کاربن کے اخراج میں کمی کے اہداف بڑھا دیے ہیں اور وہ ماحولیاتی انصاف اور پائیدار ترقی کے لیے عالمی سطح پر اپنا فعال کردار ادا کرتا رہے گا۔