موٹروے ایم فور پنڈی بھٹیاں سے عبدالحکیم تک ہیوی ٹریفک کے لیے بند

پنجاب کے میدانی علاقوں میں شدید دھند کی لہر کے باعث موٹروے ایم فور (M-4) کو پنڈی بھٹیاں سے عبدالحکیم تک ہیوی ٹریفک کے لیے عارضی طور پر بند کر دیا گیا ہے۔ موٹروے پولیس کے ترجمان کے مطابق اس بندش کا بنیادی مقصد مسافروں کی جان و مال کا تحفظ یقینی بنانا ہے۔ ترجمان سنٹرل ریجن نے شہریوں کو دھند کے ایام میں غیر ضروری سفر سے گریز کرنے اور سفر کے لیے بالخصوص صبح 10 بجے سے شام 6 بجے تک کے اوقات منتخب کرنے کی ہدایت کی ہے۔ ترجمان نے ڈرائیورز پر زور دیا ہے کہ دورانِ سفر گاڑی کی رفتار دھیمی رکھیں، اگلی گاڑی سے مناسب فاصلہ برقرار رکھیں، لین کی سخت پابندی کریں اور فوگ لائٹس کے استعمال کے ساتھ ساتھ ہیڈ لائٹس و وائپرز کو درست حالت میں رکھیں۔