حکومت کے پاس عمران خان کیلئے نہ کوئی ڈیل ہے نہ ڈھیل: طارق فضل چودھری

وفاقی وزیر پارلیمانی امور ڈاکٹر طارق فضل چودھری نے واضح کیا ہے کہ حکومت کے پاس بانی پاکستان تحریک انصاف (پی ٹی آئی) عمران خان کے لیے نہ کوئی ڈیل ہے اور نہ ہی ڈھیل، ان کی رہائی کا واحد راستہ صرف عدالتیں ہیں۔ پارلیمنٹ ہاؤس میں میڈیا سے گفتگو کرتے ہوئے انہوں نے کہا کہ عمران خان کو علاج معالجے اور طبی معائنے کی تمام سہولیات میسر ہیں اور ضرورت پڑنے پر لندن سے بھی ڈاکٹر بلایا گیا۔ طارق فضل چودھری نے خیبرپختونخوا میں پی ٹی آئی کے 13 سالہ دورِ حکومت کو تنقید کا نشانہ بناتے ہوئے کہا کہ صوبے میں مطلوبہ اہداف کے حصول تک ایمرجنسی نافذ رہے گی کیونکہ ریاست وہاں دہشت گردی کے خلاف جنگ لڑ رہی ہے جبکہ پی ٹی آئی نے اس کا کوئی ساتھ نہیں دیا۔ انہوں نے مزید کہا کہ ملک سے انتشار کی سیاست کا خاتمہ ہو چکا ہے اور اب پاکستان امن و ترقی کی جانب گامزن ہے۔